投资者，好多时候唔係investor，而係wait⋯⋯er！等（wait）乜嘢？等经济数据、等公司业绩、等破顶、等见底、等消息、等政策⋯⋯等等，总之，好多时候係waiting for the right time to invest！11月临近，投资者等紧嘅主要有三件大事：①11月4至8日全国人大常委会开会；②11月5日美国总统选举；③11月6至7日美国联储局议息（香港时间11月8日凌晨3时公布议息结果）。呢三大事件，都会扰动环球资金流向同资产价格。

下载Yahoo财经APP

美股外币即时报价 多国新闻任睇

人大常委会议 料有国债规模

9月24日以嚟，中国连环出招救市，当中包括发行超长期特别国债，但一直未有披露相关规模。财政部部长蓝佛安月中喺记者会上话：「中央财政还有较大的举债空间和赤字提升空间。」又话：「具体资金数量安排问题，经过法定程序后，会及时向社会公开。」市场预期官方会喺今次人大常委会议，提出具体发债规模。早前市传未来3年合共发行6万亿元人民币国债，协助地方化债，但呢个规模实在唔够，以地方债约70万亿计，6万亿摊分3年，1年2万亿，只够还利息。

市场除咗关注人大常委会议，亦关注最高领导人习近平讲话，睇下有乜启示。事实上，10月17日习近平喺安徽合肥滨湖科学城考察时嘅讲话，就被市场视为投资启示。佢话：「推进中国式现代化，科技要打头阵。」又话：「人生能有几回搏。」翌日内地创业板、科创板应声爆升逾10%，本港中资科技股亦爆上。话时话，习近平唔係第一次讲「人生能有几回搏」，2022年1月4日佢喺北京考察2022年冬奥筹办备赛工作时，已讲过：「人生能有几回搏，拚搏是值得的，不经一番寒彻骨，怎得梅花扑鼻香？」

若特朗普回朝 中美关係恶化

至于美国大选同美国议息，心水清嘅读者可能都留意到，人大常委会开会嘅日期係覆盖呢两件事嘅，似乎中央都在观望两者结果再行应对。观乎美国债息全线重越4厘（3个月、6个月、2年、3年、10年、30年期，分别报4.65、4.53、4.11、4.05、4.25、4.5厘），中国若要保住人民币滙率，救市空间减少。美国大选相对美国议息，前者影响比后者大，一旦特朗普回朝，对华势将加徵关税，中美关係势将恶化，金融市场难免震荡，中国需要留力应付，到时股市平準基金或将派上用场。

讲返港股，上周牛皮上落，高低波幅约560点，连日喺10天线（现处20539）争持，收20590，呈旗形整固形态；交投亦见缩减，每日成交都少过2,000亿元，但北水趁整固入市，全周累计净流入365亿元，係咪响应最高领导人讲嘅「人生能有几回搏」？抑或「春江水暖鸭先知」？姑勿论如何，现时人大常委会议、美国大选、美国议息，三大不明朗当前，入市搏，风险大。港股本周料将继续整固，喺20000关至21000关上落；要「破地狱」，要待11月上旬三大不明朗因素消除。

割柑人

本栏隔周一刊出